මරණින් මතු ජිවිතය

කවුරු උනත් මැරෙන්න බයයි නේද? (එහෙම නැති අයත් ඇති). මේ භයට හේතුව තමන් ආදරය කරන අය දාලා යන්න වෙන එකද? මරණයේදී දැනෙන වේදනාවද? එහෙමත් නැත්නම් මැරුණට පස්සේ අපිට වෙන දේ ගැන අදහසක් නැති කමද? මේ හැම දේම බලපානවා කියලයි මට හිතෙන්නේ.

කොහොම උනත් මටනම් ඒ කාලේ ආසාවක් තිබුණා ඔය මැරුණට පස්සේ වෙන දේ ගැන හොයල බලන්න. (මැරිලා බැලුවේ නැද්ද කියල අහන්න එපා  ) .  සමහරු නම් පුනරුප්පත්තියක් ගැන විශ්වාස කරන්නෙත් නැහැනේ. මම නම් විශ්වාස කරනවා ඔන්න. මට හිතෙන විදියට ඒකට ඕන තරම් සාක්ෂි තියනවා. තමන්ගේ පෙර ආත්මේ  ගැන කියන අයත් ඒ කියන විස්තර හොයා ගෙන ගිහින් ඒවා ඇත්ත කියලා සනාථ කරපු  අවස්ථාත් අපි දැකල තියනවනේ.


ඊ ළගට ගොඩක් අය විශ්වාස කරනවා ගන්ධබ්බ අවස්ථාවක් ගැන. කෙනෙක් මැරුණම තවත් කලලයකට ඇතුල් වෙන්න කලින් ටික කලක් (දිග කාලයක් වෙන්නත් පුළුවන්) ගන්ධබ්බයෙක් විදියට ඉන්නවා ලු. හැබැයි සමහරු මේ කතාව පිළිගන්නේ නැහැ. එයාලා කියන්නේ කෙනෙක් මැරුණ ගමන්ම වෙනත් කලලයකට ඇතුල් වෙනවා කියලා. හරියට කූඩල්ලෙක් ගමන් කරනවා වගේ එක තැනක් අත ඇරපු ගමන් තව තැනක් අල්ල ගන්නවලු. මම නම් පිළිගන්නේ පළවෙනි මතය.  මොකද ඔය පෙර ආත්මේ ගැන කියපු අය විස්තර කරන විදියට සමහරු මැරුණ දවසත් නැවත ඉපදුන දවසත් අතර අවුරුදු ගණනක පරතරයක් තියන අවස්ථාත් තියනවා. අනිත් එක එහෙම උනානම් මේ කාරණය පැහැදිලි කරන්න බැරි වෙනවා. අපි හිතුවොත් ජීවීන්ගේ ආරම්භය ගැන, ඒ වගේ ඉතාමත් සුළු ප්‍රමාණයක් ජීවීන් ඉඳපු කාලෙක කැමති එකක් තෝර ගන්න තරම් කළල කොහෙන් හොයන්නද? එතකොට අද ජිවත් වෙන ගොඩක් අය ඒ කාලේ ඉන්න ඇත්තේ  ගන්ධබ්බ ස්වරූපයෙන් නේද? 


කොහොම උනත් මේ ගැන ඇත්ත හොයන එකනම් අමාරු වැඩක්. ප්‍රායෝගිකව කරලා බලන්න බැහැනේ. හැබැයි බෙල්ලන ඥානවිමල හිමියන්ගේ පොතක තිබුණා එහෙම කරපු කෙනෙක් ගැන, මහාචාර්ය "මයර්ස්". එයා මැරුණම එයාගේ විස්තර ස්වයංක්‍රීය පැන්සල් වලින් ලියෙව්වලු. එයා ගන්ධබ්බ අවස්ථාව විස්තර කරලා තියෙන්නේ මහල් (layers) හතකින් යුත් ගෙයක ගමන් කරන්නෙක් විදියට. මයර්ස් ගේ සත් මහල ගැන වෙනම ලිව්වොත් හොඳයි (ඒත් මේ ලිපියට කවුරු හරි කැමති උනොත් විතරයි :). අපි ඒ ලෙවල් කරන කාලේ හැම කෙනාම ප්‍රොජෙක්ට් එකක් කරන්න ඕන කියලා නීතියක් ඇවිත් තිබුණා. ඉතින් මම තෝර ගත්තේ මේ මාතෘකාව. රිපෝට් එක හදලා මිස් ට දුන්නම ඇස් පියාගෙනම A එකක් දුන්නා "මට වල පයයි ගොඩ පයයි ඉඳගෙන ඕව කියවන්න බෑ" කියලා . 


මේ ගැන නම් නොවිසඳුණු ප්‍රශ්න ඕන තරම් තියනවා. ඒත් කවුරු හරි මේ ප්‍රශ්නෙට උත්තරේ දන්නවනම් කියල දුන්නොත් ලොකු දෙයක්..


විශ්වයේ (ජන ගහනය + සත්ව ගහනය  + ගන්ධබ්බයින් ගණන) නියතයක් ද? උදාහරණයක්‌ විදියට ජන ගහනය වැඩි වෙද්දි ඊට සාපේක්ෂව සත්ව ගහනය + ගන්ධබ්බ ගහනය අඩු වෙනවද? (හැමෝම එක පාර ළමයි හැදුවොත් ගන්ධබ්බ හිඟයක් ඇති වෙයිද? ) එහෙම නැත්නම් කාලයත් සමග අලුතෙන්  ගන්ධබ්බයින් උත්පාදනය වෙනවද? එහෙමත් නැත්නම් මේවා ගැන හොයන අපිට පිස්සුද?