අලිංගිත්වා ?

මාතෘකාවට එන්න කලින් මට තාමත් හොඳට මතක, අපිට 6 වසරෙදි උන වැඩක් ගැන කියල ඉන්නම්කෝ.

අපි 6 වසරට ඇතුල් වෙද්දි එච්චර කල් කරපු ගණිතය, සිංහල, විද්‍යාව වගේ විෂයන් වලට අමතරව "සමාජ අධ්‍යයනය" කියලා විෂයකුත් ආවා නේ. ඔය නම ඒ දවස්වල අපිට කියව ගන්නත් බෑ හරියට (ලියන්න කොහොමත් බෑ නේ ඉතින් :). අපි ඉතින් ඕක කියෙව්වෙත් ලිව්වෙත් "සමාජ අධ්‍යනය" කියලා ('ය' හලලා).

අපිට ඒ කාලේ නීතියක් දාලා තිබුනා දවස් පහේම කාල සටහන කළු ලෑල්ලේ පැත්තකින් ලියලා තියන්න ඕන. ඉතින් ඕක ලියන්න වොලන්ටියර් වෙච්ච ළමයාත් "සමාජ අධ්‍යනය" කියල තමයි ලිව්වේ. ඉතින් ඔය වැරැද්ද ඔය විදියටම කළු ලෑල්ලේ තිබුනා මාස ගානක් යනකන්ම. එක දවසක් අපේ පන්තියට ආවා ට්‍රේනින් දාපු සර් කෙනෙක් (එයාල එනවට අපිනම් හරිම කැමතියි. සැර නැහැනේ :). එයා ටික වෙලාවක් බෝර්ඩ් එක දිහා බලන් ඉඳලා මෙහෙම කිව්වා...

සර් : (ඉස්සරහ පේලියේ ඉඳපු සුරංගි ට ඇඟිල්ල දික් කරමින්) ඔය ළමයා නැගිටින්න
ඉතින් සුරංගි නැගිට්ටා.
සර් : ඔය ළමයගේ නම මොකද්ද?
සුරංගි : "සුරංගි"

ඉතින් සර් චෝක් කෑල්ලක් අරගෙන් මෙහෙම ලිව්වා බෝර්ඩ් එකේ   "සුංගි"

සර් : ඔයා කැමතිද කවුරු හරි ඔයාගේ නම මෙහෙම කියනවට?
සුරංගි : නැහැ 
සර් : ආ... එහෙනම් සමාජ අධ්‍යයනයත් කැමති නෑ එයාගේ නමේ අකුරක් අඩුවෙන් ලියනවට

එදා ඉඳන් අද වෙනකන්  මටනම් ඔය වචනේ වැරදුනේ නැහැ. වැරැද්දක් උනත් මෙහෙම නිර්මාණශීලි විදියට කියල දුන්නම හොඳට හිතට වදිනවා නේද?

                                            ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~ ~

හරි දැන් එන්නම්කෝ මාතෘකාවට. අකුරු අඩුවෙන් ලියනවා වගේම අපි කරන තවත් වැරැද්දක් තමයි වැරදි වචන පාවිච්චි කිරීම.


මේ බරපතල වැරැද්ද නම් අපිට පෙන්නලා දුන්නේ ගංගොඩවිල සෝම හාමුදුරුවෝ. දවසක් අපේ ඉස්කෝලෙට සෝම හාමුදුරුවෝ වැඩියා  බණ දේශනාවකට. හාමුදුරුවෝ අපිට කිව්වා තාත්තට වඳින ගාථාව කියන්න කියලා. හැමෝම පටන් ගත්තා ගාථාව කියන්න....

"වුද්දිකාරෝ අලිංගිත්වා චුම්බිත්වා පිය පුත්තකං..............." 
ඉවර වෙනකන්ම අහගෙන ඉඳලා හාමුදුරුවෝ මෙහෙම කිව්වා..

"ඔහොම වැන්දොත් නම් ඉතින් තාත්තට වෙන්නේ අපහාසයක්. "අලිංගිත්වා" කියන වචනේ තේරුම (මෙන්න මේක කියලා තේරුමත් කිව්වා). හරි වචනේ තමයි "ආලිංගිත්වා", ආලිංගනය කරනවා එහෙම නැත්නම් වැළඳ ගන්නවා කියන එක" 


කොයි තරම් බරපතල වැරැද්දක්ද? ඒත් තවමත් සමහර හාමුදුරුවරු පවා මේ ගාථාව අර විදියට කියනවා මම අහල තියනවා. ඒක බොහෝ දුරට නොදන්න කම හෝ නොසැලකිල්ල වෙන්න ඇති. සමහර විට ගාථාවේ මාත්‍රා ගණන ගානට සෙට් වෙන නිසා වෙන්නත් ඇති. ඒත් ඒකෙන් අර්ථය නම් විකෘති වෙනවා. අපි නම් සෝම හාමුදුරුවෝ කියනකන්ම ඕක දැනගෙන හිටියේ නැහැ. දැනගත්තට පස්සෙ වරද්දන්නෙත් නැහැ. ඉතින් මට හිතුනා මේ ගැන නොදන්න ඒත් දැනගන්න කැමති අය හිටියොත් කියලා මේක බ්ලොග් එකේ දාන්න. එක්කෙනෙක් දෙන්නෙක් හරි ඒ වැරැද්ද හදා ගත්තොත්, අනාගත පරම්පරාවට කියල දුන්නොත් ඒක ලොකු දෙයක් වගේම සතුටක් :)